बाढीपीडितहरू प्रदूषित पानी पिउन बाध्य

डडेल्धुरा जिल्लामा यसै महिनाको पहिलो साताको अविरल वर्षापछि आएको बाढीका कारण प्रभावित बासिन्दाहरू प्रदूषित पानी पिउन बाध्य भएका छन् । बाढीले खानेपानीका मुहानहरू बगाएपछि उनीहरू प्रदूषित पानी पिउन बाध्य भएका हुन् ।

बाढीका कारण प्रभावित भएका डडेल्धुरा जिल्लाका १२ भन्दा बढी गाउँका सर्वसाधारणहरू अहिले नदी र खोलानालाहरूको प्रदूषित पानी उपयोग गर्दै आइरहेका छन् ।

बाढीका कारण प्रभावित तथा विस्थापित भित्री मधेसका आलिताल, शिर्ष र जोगबुढाका करिब ७०० परिवार घन्टौँ हिँडेर रङ्गुन, महाकालीलगायतका नदीहरूको धमिलो पानी प्रयोग गर्दै आइरहेका छन् । बाढीका कारण भित्री मधेसका ६० परिवार पूर्णरूपमा विस्थापित भएका छन् भने ६८१ परिवार प्रभावित भएको जिल्ला प्रशासन कार्यालय, डडेल्धुराले जनाएको छ ।

प्रदूषित पानीकै कारण बाढीपीडितहरूमा विभिन्न सरुवा रोग देखापरेको छ । जिल्ला स्वास्थ्य कार्यालयका अनुसार उनीहरूमा ज्वरो, टाइफाइड, निमोनिया, रूघाखोकी तथा पखालाको सङ्क्रमण देखापरेको छ ।

प्रभावित क्षेत्रहरूमा दुई चरणमा हेलिकोप्टरबाट राहत सामग्री र औषधि पुर्‍याइए पनि न शुद्ध पानीको विकल्प खोजिएको छ, न पानी शुद्ध पार्न औषधिको नै प्रयोग गरिएको छ । यसैबीच विस्थापितहरूले रूखको फेदमुनि दसैँको टीका र आशीर्वाद थापेका छन् ।



नेपाल जापान डट् कम् सम्वाददाता
डडेल्धुरा अक्टोबर, १२