बाढीपीडितहरूको जीवन कष्टकर

हालैको बाढी र डुबानबाट प्रभावित कैलालीका कतिपय क्षेत्रमा अझै पनि पर्याप्त राहत तथा अन्य सहयोगका कार्यक्रमहरु पुग्न नसकेकाले पीडितहरुको जीवन कष्टकर बन्दै गएको यहाँस्थित राष्ट्रिय मानवअधिकार आयोगले जनाएको छ ।

बडादसैँको अवधिमा बाढी प्रभावित व्यक्तिहरुको मानवअधिकारको अवस्थाबारे अनुगमन गर्न त्यस क्षेत्रमा गएका आयोगका टोलीले विस्थापितका शिविरमा रहेका बालबालिका, सुत्केरी तथा गर्भवती महिला, वृद्ध, अपाङगको उचित स्याहार हुन नसकेको देखिएको कार्यालयका क्षेत्रीय संयोजक कोषराज न्यौपानेले बताउनुभयो ।

कार्यालयले विस्थापित क्षेत्रमा शिविरमा बसेकाहरु एउटै कोठामा धेरै मानिस बस्न बाध्य भएको, राति बिजुली, बत्तीको अभाव रहेको, महिला, पुरुष एकै स्थानमा बस्नुपर्ने बाध्यताले यौनजन्य घटनाहरु समेत हुनसक्ने सम्भावना देखिएको जनाएको छ ।

आयोगले पीडितहरुलाई पर्याप्त राहत नपुगेकोले तत्काल राहत पुर्‍याउन र सहयोगका अन्य कार्यक्रम लागु गर्न सरकारलाई सिफारिस गरेको छ ।

झन्डै तीन हप्ताअघि आएको बाढी तथा डुबानमा परी कैलालीमा १५ जनाको ज्यान गएको थियो भने सयौँ बिघाको धानबाली नष्ट भएको, सयौँ चौपाया मरेको र भण्डारण गरिएको अन्न र घर बगाएर क्षति पुर्‍याएको थियो ।


नेपाल जापान डट् कम् सम्वाददाता
धनगढी अक्टोबर, १३