कुवेतबाट घर फिर्नेमा अधिकांश युवती

कान्तिपुर समाचारदाता

कतार, असोज २६ - मुसलमान समुदायको पवित्र पर्व रमदानको समय पारेर कुवेत सरकारले दिएको डेढ महिना लामो आममाफी अवसरपछि घरफिर्ता हुन लागेका ५ सयभन्दा बढी नेपालीमा अधिकांश युवती छन् ।

साउदी अरेबियाको रियादस्थित नेपाली दूतावासबाट आवश्यक कागजात प्रबन्धका लागि कुवेत पुगेका कूटनीतिक अधिकारी पुष्प भट्टर्राईका अनुसार बढीमा आठ वर्षेखि कुवेतमा गैरकानुनी रूपमा बसिरहेका नेपालीसमेत भेटिएका छन् । छुटको अवसरमा घरफिर्तीमा इच्छुक देखिएकामध्ये करिब ५० जना मात्रै पुरुष छन् ।

अधिकांश देखावटी बिहा गर्नाले कानुनी उल्झनमा परेका र तोकिएको कम्पनी छाडेर भगौडा रूपमा काम गर्नेहरू भेटिएका छन्,' दूतावासका तृतीय सचिव पुष्प भट्टर्राईले भने । कुवेतस्थित माउन्ट एभरेस्ट स्पोर्टिङ क्लबका उपाध्यक्ष धर्मराज गिरीका अनुसार त्यहा“का जेलहरूमा ३३ नेपाली महिला रहेकोमा केही भने कुवेत पुगेपछि जन्मिएका शिशुहरूसहित थुनामा छन् । सामान्यतया ४० कुवेती डलर अर्थात् १० हजार रुपैया“ तलब पाउने भए पनि भगौडा बनेमा बढी सेवा सुविधा पाइने आसमा भागेर काम गर्ने युवतीहरू गैरकानुनी बन्ने गरेको उनले बताए ।

अक्टोबर १५ सम्मका लागि छुट अवसर दिइएकोमा अझै पनि थुप्रै गैरकानुनी नेपाली सर्म्पर्कमा नआएको कुवेतस्थित अर्का व्यवसायी मित्र सिञ्जालीले बताए । कुवेतमा कम्तीमा १५ हजार नेपाली रहेको अनुमान गरिएकोमा अधिकांश घरेलु कामदार छन् ।

नेपाल सरकारले घरेलु कामदारलाई प्रतिबन्ध लगाएको खाडीको कुवेतसहितका मुलुकमा नेपाली युवतीहरू आउने क्रम भने घटेको छैन । कुवेतबाहेक खाडीका ओमान, साउदी अरेबिया, संयुक्त अरब इमिरेट्स तथा कतारमा समेत घरेलु कामदार बनेर आएका नेपाली युवतीको बिचल्ली अवस्था उल्लेख्य रहिआएको छ ।

श्रोत: कान्तिपुर